22 май соли 2016 дар Ҷумҳурии Тоҷикистон маъракаи муҳими сиёсӣ-раъйпурсии умумихалқӣ оид ба ворид кардани тағйиру иловаҳо ба Конститутсияи (Сарқонуни) Ҷумҳурии Тоҷикистон доир шуд, ки натиҷаҳои пешакии он имрӯз эълон гардид.

Раиси Комиссияи марказии интихобот ва раъйпурсии Ҷумҳурии Тоҷикистон Бахтиёр Худоёрзода 23 май зимни эълони натиҷаҳои пешакии раъйпурсии умумихалқӣ иттилоъ дод, ки аз  рӯи  маълумоти  пешакӣ аз шумораи умумии раъйдиҳандагон, ки 4 миллиону 409 ҳазору 516 нафарро ташкил медиҳад, дар  ҷараёни раъйпурсӣ 4 миллиону 38 ҳазору 183 нафар раъйдиҳандагон ё худ 92% иштирок намуданд. Аз ин шумора, ба ҷонибдорӣ аз ворид кардани тағйиру иловаҳо ба Конститутсияи (Сарқонуни) Ҷумҳурии Тоҷикистон 3 миллиону 814 ҳазору 477 нафар раъй додаанд, ки ин рақам 94,5%-ро ташкил медиҳад. 3,3% раъйдиҳандагон ба муқобили ворид кардани тағйиру иловаҳо ба Конститутсия овоз додаанд.

Комиссияи марказии интихобот ва раъйпурсии Ҷумҳурии Тоҷикистон иттилоъ дод, ки мутобиқи маълумоти аз 68 комиссияҳои ҳавзавӣ воридгардида, то соати 15:00-и 22 май дар саросари ҷумҳурӣ 3 миллиону 518 ҳазору 184 нафар раъйдиҳандагон дар маъракаи муҳими сиёсӣ-раъйпурсии умумихалқӣ оид ба ворид кардани тағйиру иловаҳо ба Конститутсияи (Сарқонуни) Ҷумҳурии Тоҷикистон иштирок намуданд, ки 79,9 фоизи раъйдиҳандагонро ташкил медиҳад.

Дар Донишгоҳи давлатии Хуҷанд ба номи академик Бобоҷон Ғафуров  бахшида ба 75-солагии зодрӯзи Шоири халқии Тоҷикистон, устод Лоиқ Шералӣ бо иштироки устодону донишҷӯён ва алоқамандони  ашъори ин шоири шаҳир конфронси илмию адабӣ баргузор шуд.

Шоири халқии Тоҷикистон  устод Лоиқ Шералӣ аз ҷумлаи суханварони маъруфи нимаи дуюми асри XX ба шумор меравад. Давлат ва Ҳукумати Тоҷикистон ба гиромидошти хотираи ин шоири шаҳир  корҳои зиёдеро ба субут расонидааст. Аз ҷумла, ҷашни 60 ва 70-солагии шоири зиндаёд дар сатҳи баланд таҷлил гардиданд. «Куллиёт»-и шоир ду маротиба дар Тоҷикистон ба хатти кириллӣ ва як маротиба дар Ҷумҳурии Исломии Эрон ба хатти форсӣ нашр гардид.