Дар Коллеҷи технологии шаҳри Душанбе Олимпиадаи ҷумҳуриявӣ барои дарёфти «Ҷоми Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон» байни муассисаҳои таҳсилоти ибтидоии касбии ҷумҳурӣ, ки  13-14 июн баргузор шуд, ҷамъбаст гардид. 

Раиси Кумита оид ба таҳсилоти ибтидоӣ ва миёнаи касбӣ Фарҳод Раҳимӣ иброз дошт, ки мақсади асосии баргузории олимпиадаи мазкур, пеш аз ҳама, баланд бардоштани шавқу завқи хонандагони муассисаҳои таҳсилоти ибтидоии касбӣ ба омӯзиши илмҳои дақиқ ва дар оянда ҷалби онҳо ба соҳаҳои мухталифи илм ва гузаронидани тадқиқотҳои илмӣ мебошад.

Олимпида маротибаи  аввал бо ташаббуси  Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон доир гардида,  иштирокчиёнро аз 53 муассисаи таҳсилоти ибтидоии касбии ҷумҳурӣ бо фарогири 240 нафар ҷамъ овардааст.

Олимпиада бахшида ба амалигардонии Барномаи давлатии «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» ва тайёр намудани хонадагон барои иштирок дар Озмуни ҷумҳуриявии «Илм фурӯғи маърифат» равона гардида, ба ин васила баланд бардоштани маҳорати касбии хонандагон дар раванди фаъолияти илмӣ ва таълимӣ мебошад.

Даври якуми олимпиада дар шаҳру ноҳияҳои ҷумҳурӣ бо иштироки 795 хонанда баргузор шуда, 240 нафар ба даври ниҳоӣ роҳ ёфтанд.

Олимпиада тӯли 2 рӯз идома ёфта, хонадагони муассисаҳои таҳсилоти ибтидоии касбии ҷумҳурӣ дар он фаъолона иштирок намуда, аз худ маҳорати баланд нишон доданд.

Дар охир ғолибон бо «Ҷом»-и Кумита оид ба таҳсилоти ибтидоӣ ва миёнаи касбии, Ифтихорнома, Сипоснома, туҳфаҳои молию пулӣ қадрдонӣ гардида, инчунин беҳтаринҳо барои таҳсил ба тариқи ройгон ба коллеҷҳо аз рӯи равия тавсия гаштанд.

Бояд гуфт, ки иштирокчиёни олимпида, ки аз шаҳру ноҳияҳои ҷумҳурӣ маротибаи  аввал ба шаҳри Душанбе омадаанд,  боғу гулгаштаҳои зебо ва Осорхонаи миллии Тоҷикистонро  тамошо намуда, аз таърихи гузаштаи худ огоҳӣ пайдо карданд.