Муассисаи давлатии «Тоҷикфилм» филми наве бо номи «Ширин» таҳия намудааст, ки нахустнамоиши он 2 октябри соли 2024, соати 17.00 дар кинотеатри ба номи Тоҳир Собиров  баргузор мегардад. 

Дар таҳия ва наворбардории филм гурӯҳи эҷодию техникӣ ва ҳунарпешаҳои маъруфи Тоҷикистон ҷалб гардидааст.

Филми дар жанри драмаи оилавӣ эҷод шуда, дар бораи ҳаёти оилавии Ширину Саид қисса мекунад. Ҳаёти орому осудаи оила пас аз рӯйдоде ба зиндагии пурихтилоф мубаддал мегардад. Дар гирудори зиндагӣ барои қаҳрамони асосии филм- Ширин чеҳраи воқеии наздиконаш ҳувайдо мегардад. Муҳаббат ва тифли бегуноҳ сабаби наҷоти оила мегарданд.

Ин нахустин филми коргардони ҷавон Умеда Турсунова буда, бо ин маҳсули эҷодӣ мехоҳад ба олами синамо ворид гардад.

Бояд гуфт, ки дар мамлакат барои ҷавонони ҳунарманд тамоми шароит фароҳам оварда шудааст ва онҳо имкон доранд дар рушди кинои тоҷик саҳм гузоранд.