Дар театрҳои касбии Тоҷикистон 63 асари нав саҳнавӣ гардид, ки дар муқоиса ба соли 2023 — 10 намоиш зиёд аст. Аз ин шумора, дар театрҳои пойтахт 26 намоиш ва дар театрҳои шаҳру ноҳияҳо 37 намоиш ба тамошобинон пешкаш гардид. Дар ин хусус зимни нишасти матбуотии Вазорати фарҳанги Ҷумҳурии Тоҷикистон иттилоъ дода шуд.

Дар Паёми Президенти Ҷумҳурии Тоҷикистон ба Маҷлиси Олӣ 28 декабри соли 2024 дар радифи таҳлили дигар соҳаҳои афзалиятноки иқтисоди мамлакат, соҳаи фарҳанг низ таҳлил гардида, намуда, таъкид шуд, ки иқдоми дар замони соҳибистиқлолӣ амалинамудаи Хукумати мамлакат ба рушди фарҳанг, ҳифзи меросу анъана ва суннату арзишҳои миллӣ ва дар натиҷа ба раванди болоравии сатҳи маънавиёти ҷомеа такони бузург бахшид. Дар робита ба ин бори дигар ҳастии миллат будани фарҳанг таъкид таъкид гардид.

Дар нишасти матбуотии Вазорати фарҳанг ҳамчунин иттилоъ дода шуд, ки муассисаҳои театрӣ-консертӣ сафарҳои эҷодии ҳунариро дар 3 вилоят ва 55 шаҳру ноҳияҳо ташкил намуданд, ки он аз 12 намоишҳои театрӣ ва 25 барномаҳои консертӣ иборат буд. Соли 2024 аз ҷониби Шӯрои бадеии вазорат 95 матну асарҳои драмавӣ, мусиқӣ ва рассомӣ харидорӣ карда шуд. Сирки давлатии Тоҷикистон 52 намоишро пешниҳоди тамошобинон гардонид.

Ба ҳолати 1 январи соли 2025, дар Ҷумҳурии Тоҷикистон 25 театри халқӣ ва 18 театрҳои касбӣ ба қайд гирифта шудааст.