Мушоҳидони байналмилалӣ, ки барои назорати ҷараёни интихоботи даъвати нави вакилон ба Маҷлиси намояндагони Маҷлиси Олӣ ва маҷлисҳои вакилони халқи Вилояти Мухтори Кӯҳистони Бадахшон, вилоятҳо, шаҳри Душанбе ва шаҳру ноҳияҳо дар шаҳри Душанбе ба Тоҷикистон омадаанд, дар Осорхонаи миллии Тоҷикистон бо таъриху тамаддуни миллати тоҷик шинос шуданд 

Ба ин гурӯҳ мушоҳидон аз Русия, Гурҷистон, Қазоқистон, Беларус ва намояндагони Созмони ҳамкории Шанхай дохил буданд.

Роҳбаладони  ин муассисаи фарҳангӣ ба ҳайати мушоҳидони байналмилалӣ дар шуъбаҳои намоишии Осорхонаи миллӣ таъриху фарҳанг, ҳунармандӣ, тарзи зисти ниёгон, ҷашну анъанаҳо, либосҳои миллӣ ва дастовардҳои беназири замони соҳибистиқлолии Тоҷикистонро муаррифӣ намуданд.

Бояд гуфт, ки дар мушоҳидаи раванди интихоботи парлумонӣ дар Ҷумҳурии Тоҷикистон 229 нафар мушоҳидони байналмилалӣ аз давлатҳои гуногуни ҷаҳон  ва созмонҳои байналмилалӣ иштирок намуданд.