21 май бахшида ба Рӯзи ҷавонони Тоҷикистон дар “Боғи Устод Рӯдакӣ” аз ҷониби донишҷӯёни соҳибистеъдоди Донишгоҳи техникии Тоҷикистон ба номи академик Муҳаммад Осимӣ иқдоми эҷодӣ баргузор гардид. 

Донишҷӯён маҳорати баланди касбӣ ва рассомӣ нишон дода, манзараҳои дилфиреби пойтахт, гулгаштҳои боғи фароғатии Устод Рӯдакӣ, пайкара ва муҷассамаи Абуабдуллоҳ Рӯдакӣ ва гулу буттаҳои ҳамешасабзи шаҳри Душанберо тасвир намуданд.

Дар ин иқдом роҳбарият, омӯзгорон ва донишҷӯёни донишгоҳ, намояндагони Кумитаи кор бо ҷавонон ва варзиши назди Ҳукумати Тоҷикистон, Агентии назорати давлатии молиявӣ ва мубориза бо коррупсияи Тоҷикистон ва сокинону меҳмонони пойтахт иштирок намуда, аз раванди расмкашӣ ва истеъдоди инфиродии донишҷӯёни донишгоҳ таасуроти маънавӣ ва тахайюлоти рангин бардоштанд.

Аз ҷониби намояндаи Агентии назорати давлатии молиявӣ ва мубориза бо коррупсия викторина баргузор шуда, иштирокчиён донишу малакаи худро дар самти муқовимат бо фасод ва масъулияти шаҳрвандӣ нишон доданд.

Барномаи фарҳангӣ-фароғатии ансабли «Муҳандиси ҷавон»-и донишгоҳ таҳти унвони «Шукуҳи ҷавонӣ» пешкаши иштирокдорон гаронида шуд.

АКС: Донишгоҳи техникии Тоҷикистон ба номи академик Муҳаммад Осимӣ