8-9 март муовини раиси Девони вазирон, вазири корҳои хориҷии Туркманистон Рашид Мередов ба Ҷумҳурии Тоҷикистон бо сафари расмӣ ташриф меорад. Дар ин хусус ба АМИТ «Ховар» дар Вазорати корҳои хориҷии Ҷумҳурии Тоҷикистон хабар доданд.

Дар назар аст, ки Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Вазири корҳои хориҷии Туркманистон мулоқот менамоянд.

Дар доираи сафар мулоқоти роҳбарони мақомоти сиёсати хориҷии Тоҷикистону Туркманистон дар назар аст. Дар рафти музокирот вазирон масъалаҳои мубрами муносибатҳои дуҷонибаро бо назардошти мулоқоти дарпешистодаи сатҳи олии Тоҷикистону Туркманистон, ки моҳи апрели соли ҷорӣ дар назар аст, муфассал баррасӣ хоҳанд кард.

Дар ҳайати вазири корҳои хориҷии Туркманистон намояндагони Бонки марказӣ, Вазорати маориф, Агентии нақлиёт ва коммуникатсия, Палатаи савдо ва саноат ва дигар идораҳо шомиланд.

   ДУШАНБЕ, 07.03.2023 /АМИТ «Ховар»https://khovar.tj/2023/03/vaziri-kor-oi-hori-ii-turkmaniston-rashid-meredov-ba-um-urii-to-ikiston-bo-safari-rasm-tashrif-meorad/