289 
Дар ноҳияи Файзобод маъракаи Рӯзи даъватшаванда бо шукуҳи хосса баргузор гардида, дар он зиёда аз 40 ҷавони синни даъватӣ бо дуои неки падару модарон ба сафи Қувваҳои Мусаллаҳи Ҷумҳурии Тоҷикистон ҷалб гардид. Дар ин хусус масъулини Мақомоти иҷроияи ҳокимияти давлатии ноҳияи Файзобод ба хабарнигори минтақавии АМИТ «Ховар» Субҳониддини Маҳмуд иттилоъ доданд.
Роҳбарияти ноҳияи Файзобод дар ҷамъомад ба даъватшавандагон муроҷиат намуда, гуфтанд, ки «хизмат кардан ба Ватан — Модар бояд барои ҳар ҷавон ифтихору шараф бошад. Ватанро мисли модари хеш дӯст доштан ва мисли гавҳараки чашм онро эҳтиёт намудан қарзи фарзандии ҷавонмард аст. Хизмат дар сафи Артиши миллӣ барои ҷавонон мактаби ҳаёт ва ҷасорати мардонагӣ мебошад. Хушбахтона, бо талошҳои пайвастаи Асосгузори сулҳу ваҳдати миллӣ – Пешвои миллат, Сарфармондеҳи Олии Қувваҳои Мусаллаҳ муҳтарам Эмомалӣ Раҳмон барои фаъолияти рӯзмарраи хизматчиён дар қисмҳои ҳарбӣ шароити зарурии маишиву моддӣ муҳайё шуда, дар ҳамаи воҳидҳои низомӣ имрӯз афсарони касбии ботаҷриба ҷиҳати баланд бардоштани малакаи ҳарбиву ҷисмонии ҷавонон, тарбияи онҳо дар рӯҳияи ватандӯстӣ ва садоқат ба марзу бум фаъолияти босамар менамоянд».
Хурсандиовараст, ки имсол аз ҳисоби Мақомоти иҷроияи ҳокимияти давлатии ноҳияи Файзобод ва Вазорати мудофиа 25 ҷавони синни даъватӣ курси ронандагии ТҶММ «Мададгори мудофиа» – ро хатм намуда, ҳамчун мутахассис ба артиши миллӣ равона гардид.
Моҳпарӣ Файзуллоева, модари яке аз навдаъватон аз зиёд шудани теъдоди ҷавонони ватандӯст изҳори хушҳолӣ карда, гуфт, ки «солҳои охир зиёд гардидани шумораи ҷавононе, ки ихтиёрӣ ба сафи Қувваҳои Мусаллаҳ мепайванданд, шоистаи таҳсин аст. Яъне, ҷавонон бо камоли ифтихор ва нангу номуси ватандорӣ омодаи хизматанд. Онҳо ба хубӣ дарк кардаанд, ки ҳимояи марзу буми Ватан қарзи фарзандӣ ва мояи ифтихори ҳар ҷавонмард аст».
Дар маросим сарбози Артиши миллӣ Файзулло Самиев, ки ҳоло хизмати ватанро бо сари баланд адо намуда истодааст, иброз дошт, ки «Сарвари давлат ба неруи созанда ва бузурги ҷавонони саодатманд ва ҳимоятгарони хоки аҷдодӣ бовар дошта, амнияту субот ва пешрафту шукуфоии мамлакатро дар ҳисси баланди меҳанпарастӣ ва бозувони қавии мо, ҷавонон мебинанд. Мо бояд ба ин боварии Пешвои миллат сазовор гардида, қарзи шаҳрвандии худро бо сари баланд дар назди Модар – Ватан адо намоем».
Дар анҷоми маъракаи гусел модарони аскарбачагон маросими кулчагазон доир намуда, зимни барномаи консертии ҳунармандон бо фарзандонашон хушҳолӣ карданд.