Дар Кумитаи миллии олимпии Тоҷикистон ҷаласаи навбатии Кумитаи иҷроия баргузор гардид, ки дар он  бозиҳои варзишии соли 2023-ро баррасӣ гардид, хабар доданд ба АМИТ «Ховар» дар ин ниҳод.

Дар ҷаласаи мазкур  таъкид шуд, ки муҳимтарин чорабиниҳои соли 2023- ин Бозиҳои 19-уми Осиё дар Ҳангжоуи Чин, Бозиҳои 6-уми Осиё дар иншооти пӯшида ва ҳунарҳои размӣ дар Таиланд ва дигар мусобиқаҳои квалификатсионии байналмилалӣ мебошанд, ки ҳайати олимпии Тоҷикистон дар ин мусобиқаҳо иштирок менамояд.

Иштирок дар ин мусобиқаҳои квалификатсионӣ ба варзишгарони муваффақи мо имконият медиҳад, ки онҳо роҳхати Бозиҳои олимпии Париж – 2024-ро ба даст оранд.

Тазаккур дода шуд, ки баргузории чорабиниҳои «Дав барои хушҳолӣ», баргузории чорабинии таблиғотӣ пеш аз Бозиҳои Осиё дар шаҳри Душанбе ва татбиқи барномаҳои муқарраргардидаи Ҳамбастагии олимпӣ ва Шӯрои олимпии Осиё дар сатҳи зарурӣ вазифа ва уҳдадории дигари Кумита дар соли равон буд.

ДУШАНБЕ, 10.04.2023. /АМИТ «Ховар»/https://khovar.tj/