Дастаи мунтахаби Тоҷикистон оид ба бокс дар пойгоҳи варзишии «Алматау»-и Қазоқистон ба Чемпионати ҷаҳон омодагӣ мебинад. Дар ин хусус АМИТ «Ховар» бо истинод ба Федератсияи бокси Тоҷикистон хабар медиҳад.

Дар ҷамъомади байналмилалии машқӣ-варзишӣ ҳамчунин дастаҳои бокси Қазоқистон, Австралия, Филиппин, Арманистон ва ғайра иштирок доранд.

Даста ҷиҳати иштирок дар Чемпионати ҷаҳон-2023, ки аз 1 то 14 май дар шаҳри Тошканди Ҷумҳурии Узбекистон баргузор мешавад, аз Қазоқистон ба Тошканд сафар мекунад.

Дар чемпионат иштироки варзишгарони беш аз 140 давлат дар назар аст. Ҷумҳурии Тоҷикистонро 13 варзишгар намояндагӣ мекунад.

Ассотсиатсияи байналмилалии бокс ба ғолибон дар ҳамаи 13 вазн ҷоизапулӣ дар ҳаҷми 200 000 доллари ИМА, ба барандагони ҷои дуюм 100 000 ва ба барандагони медали биринҷӣ 50 000 доллар тақдим мекунад.

ДУШАНБЕ, 22.04.2023 /АМИТ «Ховар»/. https://khovar.tj/2023/04/ajati-dastai-muntahabi-boksi-to-ikiston-ba-chempionati-a-on-dar-azo-iston-omodag-mebinad/