Сохтори эҷодӣ

Дар телевизиони «Синамо» чор шуъбаи эҷодӣ-шуъбаи барномаҳои иттилоотию таҳлилӣ, шуъбаи филмҳои миллӣ, шуъбаи филмҳои тасвирӣ, шуъбаи филмҳои хориҷӣ ва дубляж таъсис дода шуд. Яке аз вазифаҳои оинномавии телевизиони мо таҳия ва дубляжи филмҳои гуногунжанр аст ва дар сеткаи паши барномаҳо низ ба ин самти фаъолияти муассиса афзалият дода шудааст.Ҳадафи аслии шуъба тарҷума ва дубляжи филмҳои хориҷӣ ба забони тоҷикӣ буда яке аз муҳимтарин ва сермаҳсултарин шуъбаҳои эҷодии телевизион ба шумор меравад. Зеро пахш намудани ҳар як филм бо забони тоҷикӣ дар эфир ин арҷгузорӣ ба забони давлатист ва ҳам таъмини фароғати тамашогарон, ки мехоҳанд филмҳоро бо забони модарии худ тамошо намоянд.

Шуъбаи филмҳои хориҷӣ ва дубляж 

Ҳадафи дигари фаъолияти шуъба ва дар умум телевизион ин пур намудани фазои холии филмҳои дорои аҳамияти тарбиявӣ ва баландмазмун мебошад. Бо ин роҳ аз ҳама гуна хатарҳои идеологӣ ва таҳмилгароии фарҳангҳои ғайр, ки ба афкори милли мо таъсиргузоранд, ҷилавгирӣ мешавад. Дар шуъбаи дубляж беҳтарин филмҳои дорои мазмуни баланд, ки ҷоизадори бонуфузтарин кинофестивалҳои синамоӣ мебошанд ва писанди оламиён шудаанд тарҷума ва дубляж мегарданд. Интихоби филмҳо бо дарназардошти жанрҳо муҳимтарин паҳлӯи фаъолияти шуъба буда, дар мадди аввал силсилафилмҳои баландмазмун меистанд. Ҳафтае панҷ рӯзи корӣ дар эфири телевизион силсилафилми нав пахш мегардад ва ду рӯзи истироҳат бошад ба филмҳои мустанади илмӣ омавӣ ҷудо карда шудааст. Инчунин ба филмҳои ҳунарӣ низ диққати хос дода мешавад, ки бо риояи жанрҳо (саргузаштӣ, мазҳакавӣ, муҳорибавӣ ва ғайра) аз рӯи вақту соатҳои ба тамошобин мувофиқ пахш мегарданд ва фазои тоҷикии эфири телевизонро таъмин мекунанд. Паҳлӯи дигари фаъоияти шуъба ин тарҷума ва пешниҳоди филмҳо тариқи зернавис мебошад, ки дар ин самт низ шуъба корҳои назаррасро ба анҷом мерасонад. Дар шуъба ҳамагӣ чор корманд фаъолият доранд, ки ҳар кадом донандаи хуби кори худанд. Дар баробари тарҷума ва дубляжи филмҳо муҳаррирони шуъбаи дубляж ба таҳияи филмҳои мустанду очеркҳои портретӣ машғуланд, ки асосан фарогири ҳаёту фаъолияти чеҳраҳои намоёни театру синамои миллии тоҷик мебошанд. Ин ҷо силсиламустанадҳои “Рисолат” ва силсилаочеркҳои “Далели таърих” -ро метавон ном бурд.